Romantic Urdu Poetry

Aarzuen hazaar rakhte hain, toh bhi hum dil ko maar rakhte hain. Barq kam-hausla hai hum bhi toh, dil ko be-qaraar rakhte hain. Ghair hi maurid-e-inaayat hai, hum bhi toh tum se pyaar rakhte hain. Na nigaah ne payaam ne waada, naam ko hum bhi yaar rakhte hain. Hum se khush-zamzama kahan yun toh, lab-o lehja hazaar rakhte hain. Chotte dil ke hain butaan mash.hoor, bas yahi aitbaar rakhte hain. Phir bhi karte hain ‘meer’ saahab ishq, hain jawaan ikhtiyaar rakhte hain. !!

Afsos ki dandaan ka kiya rizq falak ne, jin logon ki thi dar-khur-e-aqd-e-guhar angusht. Kaafi hai nishaani tera chhalle ka na dena, Khaali mujhe dikhla ki ba-waqt-e-safar angusht. Likhta hun ‘asad’ sozish-e-dil se sukhan-e-garm, ta rakh na sake koi mere harf par angusht. !!

Ze-bas ki mashq-e-tamasha junoon alaamat hai, kushad-o-bast-e-mizhah sili-e-nadaamat hai. Na jaanun kyonki mite daagh-e-taan-e-bad-ahdi, tujhe ki aaina bhi warta-e-malaamat hai. Ba-pech-o-taab-e-hawas silk-e-aafiyat mat tor, nigaah-e-ajz sar-e-rishta-e-salaamat hai. Wafa muqaabil-o-daava-e-ishq be-buniyaad, junoon-e-sakhta-o-fasl-e-gul qayaamat hai. !!

Umar bhar hum rahe sharaabi se, dil-e-pur-khoon ki ek gulaabi se. Jee dhaha jaaye hai sehar se aah, raat guzre gi kis kharaabi se. Khilna kam kam kali ne sikha hai, uss ki aankhon ki neem-khwaabi se. Burqa uthte hi chaand sa nikla, daagh hun uss ki be-hijaabi se. Kaam the ishq mein bahut par ‘meer hum hain faarigh hue shitaabi se. !!

Hasti apni ahbaab ki si hai  Yeh numaish Sarab ki si hai Naz ki is kay lab ki kia kehye Pankhari ik Gulab ki si hai Bar bar is kay dr peh jata hon Halat ab aztarab ki si hai Mein jo bola kah yeh aawaz  Isi khana kharab ki si hai Meer un Neem Baz aankho mein  Sari masti sharab ki si hai

Kabhi khud bhi mere paas aa meri bat sun mera sath de jo khalish hai dil se nikal ke mujhe uljhanon se nijat de tera sochna mera mashghala tujhe dekhna meri aarzoo mujhe din de apne khayal ka mujhe apne qurb ki rat de main akaila bhatkoon kahan kahan ye safar bohat taweel hai meri zindagi mere sath chal mere hathon mein apna hath de

بھٹکتی شام سے کہنا پرانے در دریچے ہیں.  اکیلی رات سے کہ دو ہمارا گھر نہیں بدلا.

Dil dharakne ka sabab yaad aaya, woh teri yaad thi ab yaad aaya. Aaj mushkil tha sambhalna aey dost, tu museebat mein ajab yaad aaya. Din guzaara tha bari mushkil se, phir tera waada-e-shab yaad aaya. Tera bhoola hua paimaan-e-wafa, mar rahenge agar ab yaad aaya. Phir kayi log nazar se guzre, phir koi shehar-e-tarab yaad aaya. Haal-e dil hum bhi sunaate lekin, jab woh rukhsat hua tab yaad aaya. Baith kar saaya-e-gul mein ‘nasir hum bahut roye woh jab yaad aaya. !!

Samaaji bebasi har shehar ko maqtal banaati hai, kabhi naksal banati hai kabhi chambal banati hai. Zara si baat hai lekin hawa ko kaun samjhaaye, diye se meri maa mere liye kaajal banati hai. Khilonon ki dukaanen kyon mujhe aawaaz deti hain, bata aey muflisi tu kyon mujhe paagal banaati hai. Suna hai jab se tayy hote hain rishte aasmaanon mein, woh pagli ungliyon se roz-o shab baadal banaati hai. Hawas mehlon mein reh kar bhi bahut maayoos rehti hai, qana-at ghaas ko chhoo kar usey makhmal banaati hai. Bahut dushwaar hai pyaare ghazal mein naadirakari, zara si bhool achchhe sher ko mohmal banaati hai. !!

Aaye ho to ek mohar-e-gadagar b laga do, is chaand se maathe pe ye jhumar b laga do. Ajdaad ki khushboo mujhe jeene ni degi, is pair k neeche mera bistar b laga do. Mumkin hai mere baad ki naslen mujhe dhundhen, buniyaad mein ek naam ka patthar b laga do. Is jung mein haare hue kehlaaoge tum hi, chaaho to numaaish mein mera sar b laga do. Ab sirf jahaazon mein safar karti hai pagli, bachpan mein jo kehti thi mere par b laga do. Ye baazi to main haath se jaane ni dunga, tum daao pe iss baar muqaddar b laga do. !!

Ab jo koi pooche b to uss se kia sharh-e-haalaat karen, dil thehre to dard sunaayen dard thame to baat karen. Shaam hui phir josh-e-qadah ne bazm-e-harifaan roshan ki, ghar ko aag lagaayen hum b roshan apni raat karen. Qatl-e-dil-o-jaan apne sar hai apna lahoo apni gardan pe, mohr-ba-lab baithe hain kis ka shikwa kis ke saath karen. Hijr mein shab bhar dard-o-talab ke chaand sitaare saath rahe, subh ki veerani mein yaaro kaise basar auqaat karen. !!

Hai ajeeb shehar ki zindagi na safar raha na qayaam hai, kahin karobaar si dopehar kahin badmijaaz si shaam hai. Kahan ab duaaon ki barkatein, woh naseehatein, woh hidaayatein Ye zaruraton ka khuloos hai, ye matalbon ka salaam hai. Yun hi roz milne ki aarzoo badi rakh rakhaao ki guftgoo, Ye sharaafatein nahin be gharaz, usey aap se koi kaam hai. Woh dilo mein aag lagayega main dilon ki aag bujhaunga, Usey apne kaam se kaam hai, mujhe apne kaam se kaam hai. Na udaas ho na malaal kar kisi baat ka na khyaal kar, kayi saal baad mile hain hum, tere naam aaj ki shaam hai. Koi naghma dhoop ke gaaon sa, koi naghma shaam ki chhaon sa zara in parindon se poochhna ye kalaam kis ka kalaam hai.

Ab apni anaa se mujhe dar lagne laga hai, sehra mein na jaane kahin sar lagne laga hai. Aage ka safar sirf meri rooh karegi, ab jism bhi samaan-e safar karne laga hai. Lagta hai ki dehleez par aa pahunchi qayaamat, ek bhai ko ek bhai se dar lagne laga hai. Waise toh koi cheez nahin badli hai lekin, tum jab se gaye ho mujhe dar lagne laga hai. Aye sehra-navardi mujhe aabadi se le chal, kuchh roz se zindaan mujhe ghar lagne laga hai. Unko nahin maloom ki ghar hote hain kaise, bachchon ko toh footpath hi ghar lagne laga hai.

Ab wahi harf-e-junoon sab ki zabaan thehri hai, jo bhi chal nikli hai woh baat kahan thehri hai. Aaj tak shaikh ke ikraam mein jo shayy thi haraam, ab wahi dushman-e-deen raahat-e-jaan thehri hai. Hai khabar garm ki phirta hai gurezaan naaseh, guftugu aaj sar-e-ku-e-butaan thehri hai. Hai wahi aariz-e-laila wahi sheerin ka dahan, nigah-e-shauq ghari bhar ko jahaan thehri hai. Wasl ki shab thi to kis darja subuk guzri thi, hijr ki shab hai toh kya sakht giraan thehri hai. Bikhri ek baar toh haath aayi hai kab mauj-e-shamim, dil se nikli hai toh kab lab pe fughaan thehri hai. Dast-e-sayyaad bhi aajiz hai kaf-e-gul-chin bhi, bu-e-gul thehri na bulbul ki zabaan thehri hai. Aate aate yunhi dum bhar ko ruki hogi bahaar, jaate jaate yunhi pal bhar ko khizaan thehri hai. Hum ne jo tarz-e-fughaan ki hai qafas mein ijaad, faiz’ gulshan mein wahi tarz-e-bayaan thehri hai. !!

Khud nawed-e-zindagi laayi qaza mere liye, sham-e-kushta hun fanaa mein hai baqaa mere liye. Zindagi mein toh na ek dum khush kiya hans bol kar, aaj kyon rote hain mere aashna mere liye. Kunj-e-uzlat mein misaal-e-aasiya hun gosha-gir, rizq pahunchaata hai ghar baithe khuda mere liye. Tu saraapa ajr aey zaahid main sar-ta-pa gunaah, baagh-e-jannat teri khaatir karbala mere liye. Naam raushan kar ke kyonkar bujh na jaata misl-e-shama, na-muwaafiq thi zamaane ki hawaa mere liye. Har nafas aaina-e-dil se ye aati hai sadaa, khaak tu ho ja toh haasil ho jila mere liye. Khaak se hai khaak ko ulfat tadapta hun ‘anees karbala ke waaste main karbala mere liye. !!

Aandhi ki zad mein shaam-e-tamanna jalaayi jaaye, jis tarah bhi ho laaj junoon ki bachaayi jaaye. Be-aab o be-giyaah hai ye dil ka dasht bhi, ek nehar aansuon ki yahan bhi bahaayi jaaye. Aajiz hain apne taala-e-bedaar se bahut, har raat hum ko koi kahaani sunaayi jaaye. Sab kuchh badal gaya hai magar log hain ba-zid, mahtaab hi mein soorat-e-jaanan dikhaayi jaaye. Kuchh saagharon mein zehar hai kuchh mein sharaab hai, ye masala hai tishnagi kis se bujhaayi jaaye. Shehron ki sarhadon pe hai sehraaon ka hujoom, kya maajra hai aao khabar toh lagaayi jaaye. Naazil ho jism o rooh pe jab behisi ka qehar, uss waqt dosto ye ghazal gungunaayi jaaye. !!

Aise hijr ke mausam kab kab aate hain, tere alaawa yaad humein sab aate hain. Jaagti aankhon se bhi dekho duniya ko, khwaabon ka kya hai woh har shab aate hain. Jazb kare kyon rait humari ashkon ko, tera daaman tar karne ab aate hain. Ab woh safar ki taab nahin baaqi warna, hum ko bulaawe dasht se jab tab aate hain. Kaaghaz ki kashti mein dariya paar kiya, dekho hum ko kya kya kartab aate hain. !!

Ye bhi kya shaam-e-mulaaqaat aayi, lab pe mushkil se teri baat aayi. Subh se chup hain tere hijr-naseeb, haaye kya hoga agar raat aayi. Bastiyaan chhor ke barse baadal, kis qayaamat ki ye barsaat aayi. Koi jab mil k hua tha rukhsat, dil-e betaab wahi raat aayi. Saaya-e-zulf-e-butaan mein ‘nasir ek se ek nayi raat aayi. !!

تیرے پہلو میں کیا رہا دل پھر نہ میرا رہا اک رہی بس تیری کمی یوں تو دامن بھرا رہا ہاتھوں میں رہی چھونے کی طلب آنکھوں میں تیرا نقش سا رہا جو اترے نہ کبھی سر سے نشہ تیرا ایسے چڑھا رہا رہے ایسے اس جہاں میں کوئی بیچ بتوں کے جیسے خدا رہا

Shamm-e-mazaar thi na koi sogwaar tha, tum jis pe ro rahe the woh kis ka mazaar tha. Tadpunga umar bhar dil-e-marhoom ke liye, kambakht na-muraad ladkpan ka yaar tha. Jaadu hai ya tilism tumhari zubaan main, tum jhooth keh rahe the mujhe aitbaar tha. Kya kya humaare sajde ki ruswaaiyaan hui,  naqsh-e-qadam kisi ka sare rahguzaar tha. !!

Aa hi gaya woh mujh ko lehad mein utaarne, ghaflat zara na ki mere ghaflat-shiar ne. O be-naseeb din ke tasawwur se khush na ho, chula badal liya hai shab-e-intezaar ne. Ab tak aseer-e-daam-e-fareb-e-hayaat hun, mujh ko bhula diya mere parwardigaar ne. Nauhagaron ko bhi hai gala baithne ki fikr, jaata hun aap apni ajal ko pukaarne. Dekha na kaarobaar-e-mohabbat kabhi ‘hafeez fursat ka waqt hi na diya kaarobaar ne. !!

Chaand ke chaaron taraf maili ridaayen saath hain, khaak itni sar chadhi kis ki hawaayen saath hain. Ek aurat se wafa karne ka ye tohfa mila, jaane kitni auraton ki badduayen saath hain. Ungliyan meri sitaaron tak pahunch sakti nahin, mutthiyon mein jugnuon ki badduayen saath hain. Din khila hai phool sa aur raat bheegi aankh si, koi mausam ho yahan donon hawaayen saath hain. Main hun ek kaaghaz ka tukra jaane kis ki khoj mein, kyon mere peechhe zamane ki hawaayen saath hain. !!

Ya to miT jaaiye ya miTa dijiye, kijiye jab bhi sauda khara kijiye. Ab jafa kijiye ya wafa kijiye, aakhari waqt hai bas dua kijiye. Apne chehre se zulfen hata dijiye, aur phir chaand ka saamana kijiye. Har taraf phool hi phool khil jayenge, aap aise hi hanste raha kijiye. Aap ki ye hansi jaise ghoongharu baje aur qayaamat hai kya ye bata dijiye. !!

Aalam hi aur tha jo shanasaiyon mein tha, jo deep tha nigaah ki parchhaaiyon mein tha. Woh be-panaah khauf jo tanhaiyon mein tha, dil ki tamaam anjuman-aaraaiyon mein tha. Ek lamha-e fusun ne jalaaya tha jo diya, phir umar bhar khayaal ki raanaaiyon mein tha. Ek khwaab-guun si dhoop thi zakhmon ki aanch mein, ek saaebaan sa dard ki purwaaiyon mein tha. Dil ko bhi ek jaraahat-e dil ne ataa kiya, ye hausla ki apne tamaashaaiyon mein tha. kaTta kahan taweel tha raaton ka silsila, sooraj meri nigaah ki sachchaaiyon mein tha. Apni gali mein kyon na kisi ko woh mil saka, jo etimaad baadiya-paimaaiyon mein tha. Is ahd-e-khud-sipaas ka puchho ho maajra, masroof aap apni paziraaiyon mein tha. Us ke huzoor shukr bhi aasaan nahin ada, woh jo qareeb-e jaan meri tanhaaiyon mein tha. !!

Woh kuchh gehri soch mein aise doob gaya hai, baithe baithe nadii kinaare doob gaya hai. Aaj ki raat na jaane kitni lambi hogi, aaj ka sooraj shaam se pehle doob gaya hai. Woh jo pyaasa lagta tha sailaab-zada tha, paani paani kehte kehte doob gaya hai. Mere apne andar ek bhanwar tha jis mein, mera sab kuchh saath hi mere doob gaya hai. Shor toh yun utha tha jaise ek toofaan ho, sanaatte mein jaane kaise doob gaya hai. Aakhiri khwaahish poori kar ke jeena kaisa, aanis’ bhi saahil tak aa ke doob gaya hai. !!

Talab ko ajar na dun, fiqar-e rahguzar na karun, safar mein ab ke hawaa ko bhi humsafar na karun. Ubharte doobte sooraj se tod lun rishta, main shaam odh ke so jaaun aur sehar na karun. Ab iss se badh ke bhala kya ho ehtiyaat-e wafa? main tere shehar se guzrun, tujhe khaber na karun. Ye mere dard ki daulat, meri maata-e  firaaq in aansu’on ki wazaahat main umar bhar na krun. Ujaad shab ki khalish ban ke bann mein kho jaaun main chandni ki tarha khud ko dar-ba-dar na karun. Wo ek pal ko dikhaayi toh de kahin ‘mohsin main jaan ganwa ke bhi uss pal ko mukhtasar na karun. !!

Jis ne jo bhi isey khyaal kiya, maine toh Ishq behrhaal kiya. Aaj sab ka mizaaj zar-e qalaam, kal bhi aahon ne inteqaal kiya. Baat karte toh baat ban jaati, khamoshi khamoshi kamaal kiya. Shor barpa hua aandhi aandhi, jab hunar ka chiraagh laal kiya. Mauj uthi deeda-e tar mein, jab maazi ko maine haal kiya. Waqt qurbat mein ruk raha na tha, ab ke maah-o saal kiya. !!

Bayaan E haal mufassal nahi hua ab tak Jo mas’ala tha wohi hal nahi hua ab tak Nahi raha kabhi main teri dastaras se door Meri nazar se too ojhal nahi hua ab tak BichhaR ke tujh se ye lagta tha tut jaunga Khuda ka shukr hai paagal nahi hua ab tak Jalaye rakkha hai main ne bhi ek chiragh E umeed Tumhara dar bhi muqaffal nahi hua ab tak Mujhe tarash raha hai ye kaun barson se Mera wajood mukammal nahi hua ab tak Daraaz dast E tamanna nahi kiya main ne Karam tumhara musalsal nahi hua ab tak

تم نے بھی ان سے ہی ملنا ہوتا ہے جن لوگوں سے میرا جھگڑا ہوتا ہے اس کے گاؤں کی ایک نشانی یہ بھی ہے ہر نلکے کا پانی میٹھا ہوتا ہے میں اس شخص سے تھوڑا آگے چلتا ہوں جس کا میں نے پیچھا کرنا ہوتا ہے تم میری دنیا میں بلکل ایسے ہو تاش میں جیسے حکم کا اکاّ ہوتا ہے کتنے سوکھے پیڑ بچا سکتے ہیں ہم  ہر جنگل میں لکڑہارا ہوتا ہے

میں ھوں سورج اداس شاموں کا تیرے لفظوں میں ڈوب جاتا ھوں