نہ یہ شیشہ، نہ یہ ساغر، نہ یہ پیمانہ بنے جانِ میخانہ، تری نرگسِ مستانہ بنے

نہ یہ شیشہ، نہ یہ ساغر، نہ یہ پیمانہ بنے

 جانِ میخانہ، تری نرگسِ مستانہ بنے

 مرتے مرتے نہ کبھی عاقل و فرزانہ بنے

 ہوش رکھتا ہو جو انسان تو دیوانہ بنے

 پرتوِ رخ کے کرشمے تھے سرِ راہ گذار

 ذرّے جو خاک سے اٹھّے، وہ صنم خانہ بنے

 موجِ صہبا سے بھی بڑھ کر ہوں ہوا کے جھونکے

 ابر یوں جھوم کے چھا جائے کہ میخانہ بنے

 کارفرما ہے فقط حُسن کا نیرنگِ کمال 

چاہے وہ شمع بنے چاہے وہ پروانہ بنے

 چھوڑ کر یوں درِ محبوب چلا صحرا کو

 ہوش میں آئے ذرا قیس نہ دیوانہ بنے

 خاک پروانے کی برباد نہ کر بادِ صبا 

عین ممکن ہے کہ کل تک مرا افسانہ بنے

 جرعہٴ مے تری مستی کی ادا ہو جائے 

موجِ صہبا تری ہر لغزشِ مستانہ بنے 

اُس کو مطلوب ہیں کچھ قلب و جگر کے ٹکڑے 

جیب و دامن نہ کوئی پھاڑ کے دیوانہ بنے

 رند جو ظرف اٹھا لیں وہی ساغر بن جائے

 جس جگہ بیٹھ کے پی لیں وہی میخانہ بنے