Kaise kahen k yaad-e-yaar raat jaa chuki bahut,
raat b apne saath saath aansoo baha chuki bahut.
Chaand b hai thaka thaka taare b hain bujhe bujhe,
tere milan ki aas phir deep jala chuki bahut.
Aane lagi hai ye sadaa door ni hai shehar-e-gul,
duniya humari raah mein kaante bichha chuki bahut.
Khulne ko hai qafas ka dar paane ko hai sukoon nazar,
aey dil-e-nazar shaam-e-ghum hum ko rula chuki bahut.
Apni qayaadaton mein ab dhoondenge log manzilen,
raahzanon ki rahbari raah dikha chuki bahut. !!
Comments
Post a Comment